مقامات محلی در ولایت غور میگویند امنیت ولسوالی دولتیار آن ولایت روز گذشته رسما” به نیروهای امنیتی افغان واگذار گردید.
در جریان مراسم انتقال مسولیتهای امنیتی ولسوالی دولتیار ولایت غور سفیر ایتالیا در کابل و مقامات بلندرتبه کشور لتوانیا حضور داشتند.
عبدالحی خطییبی سخنگوی والی غور میگوید مراسم انتقال مسولیتهای امنیتی ولسوالی دولتیار در جریان یک محفل ویژه صورت گرفت و والی غور از جامعه جهانی خواست تا در عرصه تجهیز و آموزش نیروهای امنیتی افغان اقدام جدی صورت گیرد.
وی افزود قبل از این امنیت ولسوالی دولتیار ولایت غور به عهده سربازان لتوانیایی بود.
بنا به اظهارات وی در حال حاضر سربازان پولیس و اردوی ملی امنیت ولسوالی دولتیار غور را به عهده گرفتند.
ولسوالی دولتیار غور در این اوآخر شاهد چندین حادثه نا امنی بوده که این خود نگرانی باشنده گان آن ولسوالی را برانگیخته است.
مقامات محلی در ولایت غور میگویند قرار است امنیت ولسوالیهای دولینه و لعل و سرجنگل آن ولایت نیز در مرحله سوم انتقال مسولیتهای امنیتی به نیروهای افغان واگذار گردد.
بعد از شهر چغچران مرکز ولایت غور این اولین ولسوالی آن ولایت میباشد که مسولیتهای امنیتی آن رسما به نیروهای امنیتی افغان واگذار شد.